ໃນຕອນ​ແລງ​ຂອງວັນ​ທິ 19 ສິງ​ຫາ 2016 ທີ່​ຜ່ານ​ມາ​ເວ​ລາ 1:00 ນ​າ​ທີ ຄະ​ນະ​ຮາກ​ຖານພັກ​ພະ​ແນກ ໄປ​ສະ​ນີ, ໂທ​ລະ​ຄົມ​ມະ​ນາ​ຄົມ ແລະ ການ​ສື່​ສານ​ແຂວງ​ຄຳ​ມ່ວນ ໄດ້​ຈັດ ພິ​ທີ​​ເຊື່ອມ​ຊຶມ​ເອ​ກະ​ສານ ທີ່​ຕິດ​ພັນ​ກັບ​ວຽກ​ງານກວດ​ກາ-ຕີ​ລາ​ຄາ​ຈັດ​ແບ່ງ​ປະ​ເພດຄຸນ​ນະ​ພາບ​ການ​ຈັດ​ຕັ້ງ​ພັກ ແລະ ສະ​ມາ​ຊິກ​ພັກຂອງ​ຮາກ​ຖານ​ພັກໃນຂົງ​ເຂດຂະແໜງການ​ໄປ​ສະ​ນີ, ໂທ​ລະ​ຄົມ​ມະ​ນາ​ຄົມ ແລະ ການ​ສື່​ສານ​ຂື້ນຢ່າງເປັນທາງການ ຢູ່ທີ່ຫ້ອງປະ​ຊຸມ​​ບໍ​ລິ​ສັດ ​ລັດ​ວິ​ສາ​ຫະ​ກິດລາວ​ໂທ​ລະ​ຄົມ​ ສາຂາ​ແຂວງ​ຄຳ​ມ່ວນ

ໂດຍການ​ເປັນ​ປະ​ທານ​ຂອງ​ ສະ​ຫາຍ ​ໄທ​ຍະ​ພອນ ສິງ​ທອງ ​ເລ​ຂາ​ຄະ​ນະ​ພັກຮາກຖານ,  ຫົວ​ໜ້າ​ພະ​ແນກ ປ​ທ​ສ ແຂວງ, ​ໂດຍເປັນ​ກຽດ​ເຂົ້າ​ຮ່ວມ​ຂອງ ສະ​ຫາຍ ແກ້ວ ວົງ​ພະ​ຈັນ ຮອງ​​ຫົວ​ໜ້າປະ​ທານກວດ​ກາ​ພັກ-ລັດແຂວງ, ສະ​ຫາຍ ດ​ຣ ອຸນຫຼ້າ ຜາ​ລີ​ວົງ ຮອງ​ຫົວ​ໜ້າ​ຄະ​ນະ​ຈັດ​ຕັ້ງ​ແຂວງ, ສະ​ຫາຍ ອຸ​ດອນ ສຸດ​ທິ​ລາດ ຮອງ​ຫົວ​ໜ້າ​ຄະ​ນະໂຄ​ສະ​ນາ​ອົບ​ຮົມ​ແຂວງ, ບັນດາສະຫາຍໃນຄະ​ນະ​ພັກ​ຮາກ​ຖານ, ເລ​ຂາຮອງເລຂາ​ໜ່ວຍ​ພັກ​ພ້ອມ​ດ້ວຍບັນດາສະຫາຍ​ສະ​ມາ​ຊິກ​​ພັກສົມ​ບູນ ແລະ ສຳ​ຮອງ​ 3 ໜ່ວຍພັກທີ່ຂື້ນກັບຮາກຖານພັກພະແນກ ປທສ ເຂົ້າ​ຮ່ວມ​ທັງ​ໝົດ 49 ສະ​ຫາຍ, ຍິງ 18 ສະ​ຫາຍ.

       ກອງປະຊຸມໄດ້ດໍາເນີນໄປດ້ວຍບັນຍາກາດທີ່ມີຄວາມໝາຍຄວາມສໍາຄັນ ມີເນື້ອໃນໜັກແໜ້ນຄົບຖວ້ນ, ມີຜົນສໍາເລັດສູງ  ຕາມຈຸດປະສົງເປົ້າທີ່ວາງໄວ້.  ບັນດາສະຫາຍທີ່ເຂົ້າຮວ່ມກອງປະຊຸມຍັງໄດ້ຮັບຟັງການນໍາສະເໜີບັນດາເອກະສານຕ່າງໆເຊັ່ນ:ແຈ້ງການເພີ້ມເຕີມຂອງຄະນະຈັດຕັ້ງແຂວງ ເລກທີ 238/ຄຈຂ.ຄມ; ວ່າດ້ວຍການກວດກາ, ຕີລາຄາແບ່ງປະເພດຄຸນນະພາບການຈັດຕັ້ງພັກ, ສະມາຊິກພັກ ,ເອກະສານປັບປຸງຄຸນທາດການເມືອງ, ຄຸນສົມບັດສິນທຳປະຕິວັດ,  ຂໍ້ກໍານົດຂອງກົມການເມືອງສູນກາງພັກ ເລກທີ 02/ກມສພ; ວ່າດ້ວຍລະບອບ ການກວດກາຕີລາຄາແບ່ງປະເພດສະມາຊິພັກ,ຂໍ້ຫ້າມສຳລັບສະມາຊິກພັກ.

 

      ກອງປະຊຸມຍັງໄດ້ຮັບຟັງການໂອ້ລົມຂອງຄະນະປະທານເຊິ່ງທ່ານໄດ້ເໜັ້ນໜັກ ແລະ ແນະນໍາເພີ້ມເຕີມກ່ຽວກັບຂັ້ນຕອນ,ວິທີການຕີລາຄາຈັດແບ່ງປະເພດຂອງຮາກຖານພັກ, ໜ່ວຍພັກ ແລະ ສະມາຊິກພັກເພື່ອໃຫ້ຖືກຕ້ອງ ແລະ ຄົບຖ້ວນຕາມມາດຖານເງື່ອນໄຂທີ່ວາງໄວ້ ໃນການກໍ່ສ້າງ ແລະ ປັບປຸງການຈັດຕັ້ງພັກ, ປັບປຸງແບບແຜນການນໍາພາຂອງຄະນະພັກຕະຫຼອດຮອດສະມາຊິກພັກທຸກໆສະຫາຍພາຍໃນຂົງເຂດຂະແໜງການໄປສະນີ, ໂທລະຄົມມະນາຄົມ ແລະ ການສື່ສານຂອງພວກເຮົາ ໃຫ້ມີຄວາມເຂັ້ມແຂງ ແລະ ຂະຫຍາຍຕົວຢ່າງບໍ່ຢຸດຢັ້ງ.

 

          ກອງປະຊຸມດໍາເນີນມາເປັນເວລາເຄິ່ງວັນ ແລະ ໄດ້ຮັບຜົນສໍາເລັດລົງຢ່າງສະຈົບງາມ.