ໃນປີ 2017 ຕະຫຼາດສະມາດໂຟນຈະກັບມາຮ້ອນອີກເທື່ອ, Apple ມີແຜນເປີດໂຕ iPhone 8 ໃນວາລະພິເສດທີ່ iPhoneມີອາຍຸຄົບຮອບ 10 ປີ, ດ້ານ Samsung ຈະສົ່ງ Galaxy S8 ອອກມາໃນໄຕມາດທຳອິດ ເຊິ່ງມັນມີຄວາມໝາຍຫຼາຍສຳລັບ Samsung ຫຼັງຈາກລົ້ມເຫຼວຢ່າງໜັກກັບ Galaxy Note 7 ແລະ ມີແນວໂນ້ມວ່າ Nokia ຈະເປີດໂຕສະມາດໂຟນລຸ່ນໃໝ່ ໃນຊ່ວງເວລາດຽວກັນກັບ Galaxy S8 ນຳ

 

ຄັ້ງໜຶ່ງ Nokia ເຄີຍເປັນຜູ້ຜະລິດໂທະສັບມືຖືຊັ້ນນຳຂອງໂລກ ກ່ອນທີ່ຈະຍ່າງພາດ ເພາະເລືອກໃຊ້ລະບົບປະຕິບັດການ Windows Mobile ສວນກະແສຕະຫຼາດສະມາດໂຟນ ທີ່ສ່ວນໃຫຍ່ຫັນໄປໃຊ້ Android ຂອງ Google ຈົນໃນທີ່ສຸດ Nokia ຕ້ອງອອກຈາກຕະຫຼາດສະມາດໂຟນໃນປີ 2014 ໂດຍການຂາຍກິດຈະການໂທລະສັບມືຖືໃຫ້ກັບ Microsoft ເພື່ອໃຫ້ແບຣນ Lumia ຍັງຄົງຢູ່ໃນຕະຫຼາດ ແຕ່ທີ່ສຸດ Lumia ກໍ່ຖືກລຶບອອກໄປຈາກຕະຫຼາດສະມາດໂຟນໃນປີ 2016.

ແຕ່ຢ່າງໃດກໍ່ຕາມ ສາວົກ Nokia ເລີ່ມເຫັນຊ່ອງທາງໃນການກັບມາຍິ່ງໃຫຍ່ ເມື່ອເດືອນພຶດສະພາທີ່ຜ່ານມາ Nokia ໄດ້ປະກາດຈັບມືກັບ HMD Global ເພື່ອກັບມາຕະຫຼາດສະມາດໂຟນອີກເທື່ອ ແລະ ເລີ່ມມີຄວາມຊັດເຈນຂຶ້ນເລື້ອຍໆ ໃນຊ່ວງທ້າຍປີນີ້ ມີລາຍງານວ່າ Nokia ຈະເປີດໂຕສະມາດໂຟນລຸ່ນໃໝ່ໃນທ້າຍເດືອນກຸມພາປີໜ້າ ທີ່ງານ Mobile World Congress 2017 ແລະ ພ້ອມໃຊ້ລະບົບປະຕິບັດການ Android ຢ່າງແນ່ນອນ.

 

ການກັບມາໃນວົງການສະມາດໂຟນຂອງ Nokia ຈະເຮັດໃຫ້ເຈົ້າຂອງຕະຫຼາດແບບ Apple ກັບ Samsung ສັ່ນສະເທືອນໄດ້ ຫຼື ບໍ່? ເນື່ອງຈາກກະແຈຄວາມສຳເລັດ ແມ່ນການຊິງຖານລູກຄ້າຂອງ 2 ຄ້າຍມາໃຫ້ໄດ້ ນັ້ນຈຶ່ງເປັນຄວາມທ້າທາຍຂອງ Nokia ທີ່ຈະເອົາຊະນະຄວາມພັກດີຂອງລູກຄ້າທີ່ມີຕໍ່ແບຣນ Apple ກັບ Samsung.

Nokia ຈະບໍ່ມີບົດບາດສຳຄັນໃນການກັບມາສູ້ເສິກເທື່ອນີ້ ເພາະຜູ້ບັນຊາການທີ່ແທ້ຈິງແມ່ນ HMD Global ບໍລິສັດທີ່ມີຖານໃນຟິນແລນເຊັ່ນກັນ ແຕ່ຜູ້ບໍລິຫານສ່ວນໃຫຍ່ກໍ່ບໍ່ທຳມະດາ ເພາະມີປະສົບການໃນຕະຫຼາດສະມາດໂຟນຫຼາຍສົມຄວນ. ປະທານບໍລິສັດ Florian Seiche ລາວເຄີຍເຮັດວຽກກັບ Siemens, Orange, HTC ແລະ Nokia, ສ່ວນເຈົ້າໜ້າທີ່ຝ່າຍການຕະຫຼາດແບບ Pekka Rantala ກໍ່ເຄີຍເຮັດວຽກໃຫ້ກັບ Nokia ແລະ ເຄີຍເປັນຊີອີໂອຂອງ Rovio ຜູ້ສ້າງເກມ Angry Birds, ນອກຈາກນີ້ຍັງໄດ້ Arto Nummela ມານັ່ງເປັນຊີອີໂອ.

Arto Nummela ກ່າວກັບສຳນັກຂ່າວ Reuters ວ່າ “ພວກເຮົາຕ້ອງການຈະກັບມາເປັນ ໜຶ່ງໃນຜູ້ນຳທຸລະກິດສະມາດໂຟນ” HMD Global ຈະສ້າງຕະຫຼາດສະມາດໂຟນ ພາຍໃຕ້ແບຣນຂອງ Nokia ໂດຍມີສັນຍາການໃຊ້ເຄື່ອງໝາຍການຄ້າ Nokia ນານ 10 ປີ ແລະ ໃຫ້ Foxconn ເປັນຜູ້ຜະລິດ ພ້ອມທັງໃຊ້ລະບົບປະຕິບັດການ Android ຂອງ Google.

 

ຂອບໃຈແຫຼງ່ຂ່າວຈາກ: http://www.devcrown.com/